Dil capitano zeneral sier Antonio Grimani procurator date apresso il Zante et di tutti tre li provedadori, a dì 8 di l'istante, venute per via di terra. Come per do spie venute da Patras, lozono in caxa di uno cristian, à inteso come a dì 29 di note Zuam Muscho vayvoda di Lepanto con alcuni altri di la terra quali sono questi: Andrea de Jvani, Andrea Zaffa, Alvixe Zordan et Alvixe Dragopolo andono in campo dal bassà con certi capitoli quali mandò al Signor et li concesse, et cussì si deteno, et li fanti erano lì reduti in castello el zorno seguente si rese, l'armata volea meter Lepanto a sacho non è stà lassato per il comandamento dil Signor, ma si tien serà le porte et si scrive le caxe et la roba di cadauno. Item, in l'armada è molti amaladi, et molti muor, si dice partirà, non si sa per dove; et perché Napoli, Modon et Coron stavano mal et in pericolo, esso [1340] capitano con li provedadori haveano terminà mandarvi uno provedador con 5 galie a Napoli, et uno altro a Modon, tamen per non sminuir le forze non manderà, perché licet li tempi si mutano potrà l'armata nimicha andar a Corphù, perhò starano lì a veder, et hanno spie fuora, et sier Nicolò Ferro provedador al Zante era impaurito li à dato licentia, et à posto sier Nicolò Marzelo soracomito vice provedador, et sopra la sua galia à posto il fiol, qual sier Nicolò vuol solum le spexe, et a deputà Jacometo da Novello con page 170 parte di le qual è a Corphù, et a Moro Biancho contestabele stava lì al Zante con 50 page li à cresuto fino a 100. Item, à dato licentia a quelli dil Zante, che erano molto spauriti, di mandar le lhoro fameje via, et a li stratioti resterano lì à levà et absolti di la decima pagano a la Signoria nostra.