Item, ricevuto lettere, di 14 in la materia de scriver in Hungaria, soa majestà disse voleva mandar uno messo in Hongaria, et il cardinal à ditto il re vol far armada et campo terestre contra turchi, et vol otenir dal pontefice decime di preti in la Franza, et la ducea di Milan a questo efecto. Item, il re à inteso la Signoria esser levà di Codignola, li à piaciuto assai, et à ditto al cardinal cognoso quella Signoria facea mal a innovar, etc. Et che il roy vol mandar un araldo in Hungaria. Et che molti detratori à ditto la Signoria nostra non vol un gran vicino apresso caxa, poi disse tutta Italia se inchina al re nostro, et soa majestà voria saper la intention di la Signoria nostra zercha il regno di Napoli. Item, perché il Turcho teme il re, soa majestà vol scriverli restituischa quello à tolto a la Signoria nostra soa colligata, aliter lo provederà di guerra. Item, doman si aspeta lì el ducha di Savoja, et ivi si à trovà il marchexe di Saluzo et quel di Monferà et il signor Constantin Arniti; doman il re si parte et va a Chievas.
     
      Li savii, leto queste lettere, si reduseno a consejar per le nove si ha turchi vien in Friul; et scritto lettere a Udene, Gradischa et Trevixo stagino riguardosi, et fo mandà homeni et monition a Monfalcon, et scritto a le terre per li homeni.
     
      [1353] Da Cremona, di sier Marco Antonio Morexini el cavalier provedador, di 22. Si scusa non haver fato acordo col castelan se non di voluntà di la Signoria nostra, come li era stà scritto, et sempre havia parlato a ditto castelan presente il suo secretario Nicolò Aurelio et el conte Alvixe Avogadro.