Item, fu posto che li savii fono electi a tanxar siano tanxadi mo lhoro per il collegio nostro a bossoli e fu presa.
     
      Item, fu posto per li ditti savii elezer de presente per scrutinio do governadori a Cremona, uno fazi l'oficio dil podestà l'altro dil capitano, habino ducati 120 al mexe per uno per spexe, il podestà meni uno vichario, uno zudexe di maleficio, canzelier, contestabele et cavalier, e il capitano meni canzelier et do cavalieri, menino tutti do 8 famegii per uno e 6 cavali, stagino uno anno solamente, e partino termine zorni 6, possino esser electi di ogni officio. Item, sia electo per election do man et la bancha uno camerlengo con ducati 30 al mexe per uno anno, et similiter uno castelan qual stagi serado et habi ducati 40 al mexe. Sier Leopoldo Grimani contradixe dicendo era tropo danari 120 ducati, e sier Alvixe da Molin e sier Zorzi Corner el cavalier savii a terra ferma messeno havesse solum ducati 100 al mexe, et balotate have molte di no, et iterum balotà perché la pendeva fu preso di no, unde fu mudada la parte e li cai di XL messeno habino essi governatori ducati 70 al mexe. Item, siano electi do camerlengi ut supra con ducati 25 l'uno al mexe, e il castelan ducati 40. Et andate le parte questa fu presa, et fono electi come apar qui sotto, steteno pregadi suso fin hore 4 di notte.
     
      [1357]Electi do provedadori a Cremona.
     
      Sier Nicolò di Prioli, fo cao dil consejo di X, q. sier Zuane 26,151
      Sier Piero Balbi, fo consejer, q. sier Alvixe 72,114
      Sier Hironimo Morexini, è di pregadi, q. sier Carlo 59,126