Et queli messe la ditta parte fono sier Domenego Marin, sier Filippo Trum procurator, sier Domenego Trivixan el cavalier savii dil [1364] consejo, sier Francesco Trum, sier Alvixe da Molin, sier Zorzi Corner el cavalier savii a terra ferma, sier Marin Sanudo, sier Faustin Barbo et sier Zuam Moro savii ai ordeni; et a l'incontro sier Polo Barbo e sier Lucha Zivrian consejeri e li tre cai di XL messeno che sier Polo Calbo e sier Justo Guoro fusse comesso a ditto zeneral vedesse se li meritavano venir qui o no.
     
      Andò le parte, 11 non sincere, 14 di no, di quella di do consejeri 75, di quella di savii 96 e nulla fu preso, iterum andò le parte, e perché fo trovà vario fo umbrà el consejo, fono balote 197, et voleva cazar li parenti di patroni, e nui savii non volessemo, e fo terminà mandar le parte separade e prima la comission sola have 9 non sincere, 12 di no, 178 di la parte e fu presa.
     
      Et è da saper, insieme con ditta comission, per tutti li savii, fu posto una lettera separada al zeneral Trivixan che zonto sarà in armada debbi far montar sier Antonio Grimani col suo armirajo e fameja sopra una fusta e farli comandamento vengi a dretura qui a presentarsi a le prexon, e sia comesso a li avogadori di comun, e non ensi se non sarà spazato per questo consejo. Item, debbi formar il processo e sia mandà uno nodaro di l'avogaria con lui a far ditto processo contra el Grimani e altri. E damò sia preso tutto il caso sia comesso a li avogadori di comun, et have le balote ho notà di sopra.
     
      Item, fu posto, per sier Polo Barbo e sier Lucha Zivrian consejeri e tre cai di XL sier Polo Calbo e sier Zusto Guoro, sia comesso al capitano zeneral va a veder etc.