Fo expedito Francesco da la Zuecha secretario, va in Hungaria a intertenir quel re non faci paxe con turchi, et soliciti il re et baroni a romperli guerra in favor di la cristianità, va con il frate, mena 4 cavalli, et datoli ducati ...
     
      Da poi disnar, fo pregadi. Vene il principe non fu posto parte alcuna, ma electi de more 4 savii dil consejo rimase primo sier Nicolò Trivixan procurator fo savio dil consejo, sier Francesco Foscarini fo savio dil consejo da San Polo, sier Ferigo Corner procurator fo savio dil consejo, et altro non passò; cazete con titolo sier Marco Antonio Morexini el cavalier et sier Constantin di Prioli. Item, 4 savii a terra ferma, primo sier Antonio Loredan el cavalier ambasador al re di Franza, sier Lunardo Grimani fo savio a terra ferma, et per tre mexi sier Piero Balbi fo consejer, et sier Lorenzo di Prioli fo avogador di Comun, et tutti introno. Item, do cassieri, rimase sier Priamo Da Leze et sier Zuam Moro savio ai ordeni; fo fato la election di la zonta justa il solito.
     
      [1380] Da Cremona, di sier Antonio Marco Morexini el cavalier governador, di 28. Come mandava le intrade di Cremona le qual sarà qui sotto anotade. Item, bisognava la Signoria subvenisse quel populo di formento, et à inteso la election di proveditori in quella città, prega et suplicha li sia dato licentia. Item, lì è formenti per do anni.
     
      Di sier Nicolò Foscarini provedador zeneral, date a dì 28 a Pandin castello dil conte Alberigo di Sanseverin. Come quel loco non era forte, avisa quelli di Lodi aver comenzà a ruinar al revelin di qua di Adda, siché la Signoria nostra ordeni quello habi a dir.