Agli humillissimi piedi de la qual continue mi richomando.
     
      [23]
     
      Dil mexe di marzo 1507.
     
      [1507 03 01]A dì primo. Cai del consejo di X: sier Francesco Tiepolo, sier Polo Antonio Miani et sier Benedeto Sanudo. Et da poi disnar fo pregadi, et leto letere di Napoli, di oratori nostri, venute in zorni 4, di grandissima importantia. Qual forone secretissimo; unum est, che li oratori, andati ivi a congratulation dil re, stano ancora, et non si parla de darli licentia di repatriar; quel seguirà scriverò poi.
     
      Di Faenza, di sier Marco Zorzi, proveditor, di 25. Come in quel zorno il papa partì de Ymola per Forlì, et passò per il teritorio di Faenza, ma pocho. Et era con soa beatitudine 14 cardinali, perhò che li altri, fino al numero 27, qualli erano a Bologna, chi andono in qua et chi in là. Et havia la soa guardia di provisionati, et Zuan Paulo Bajon con la soa conduta, di homeni d'arme ..., et altri disarmati. Esso provedador, di hordine di la Signoria nostra, hessendo zonto lì sier Domenego Malipiero, provedador di Romagna, con Latantio da Bergamo con li provisionati, havendo auto hordine di la Signoria nostra, li andò contra, et smontò da cavallo, et fece le debite reverentie al papa, oferendoli nomine Dominii etc. Il papa rispose bona verba; et cavalchono fuora di confini zercha mia 3, ben accompagnato esso provedador nostro; e, tolto licentia, vene a Faenza. Il papa andò di longo a Forlì; el ducha de Urbim passò per Faenza, et alcuni cardinali, ma il papa non vi volse intrar; el qual zonse la sera a Forlì etc.