Et dize, in Alexandria erano oglij assai, portati lì con nave ragusee. Item era fama in la Morea, che turchi haveano l'ochio a Napoli di Romania.
     
      Da Corphù, dil provedador di l'armada, sier Hironimo Contarini. Cosse replichade; et che erano venute zente a Durazo, per causa dil re di Spagna ch'è a Napoli; solicita si armi, et che è con pochissime galie etc.
     
      Da Traù, di sier Bernardin Contarini, conte. Come di note tempo, hessendo reduti zercha 4000 bestiami in li borgi dil castello dil vescovo a la marina, perchè intendevano di certa coraria si dovea far per turchi, e posto le zente inutile nel castello e le utile ne li borgi, or con astuzia turchi fono aperti e introno, prese lì anime numero 20, et tuti li animali, et le conduseno via etc.
     
      Di Napoli, di 12, di oratori nostri, sier Zorzi Pixani, dotor, cavalier, sier Marco Dandolo, dotor, cavalier, sier Cabriel Moro, el cavalier. Come era stà expedito domino Bartolomeo Alviano dal re, et datoli, in loco dil duchato di San Marco in Calabria, do contadi in l'Abruzo, videlicet el duchato de Buchianicho et el contado de Mala Pelle, con promessa de suplir a quanto manchasse a la summa de l'intrada l'havea dil sopradito duchato. Item, erano stà designati 3 oratori a Roma, al papa, pro praestanda obedientia, et per haver la investitura del regno etc., videlicet el comendador de Montisa, el doctor Augustino, domino Hironimo de Vico. Item, era zonto uno orator dil re di Portogal, pro congratulatione de incolumi adventu in regno de sua alteza; et Consalvo Ferando li andò contra, nomine regio.