Lì se trovava la cesarea majestà, per seguir el camino verso Bergogna. Erano zonti oratori di Olanda, Fiandra, et di loci subiecti al quondam archiducha, qualli doveano jurar fideltà al fiol de dicto quondam archiducha. La majestà di la regina era andata a Costanza, per la dieta se preparava lì, e starà loco tenente a dicta dieta, per fina el zonzer lì di la cesarea majestà. Et come lì si ritrova la fiola, madama Margarita, fo moglie dil duca di Savoja et maridata nel re di Ingaltera; con la qual sua majestà havea fato uno zocho a' schachi, de memoria, presente esso orator nostro. Item, domino Constantin Arniti havea habuto audientia, tamen non era stà expedito. Item, che a Guanto era stà decapitato uno, che andava sussitando i populi che non se desse a la cesarea majestà etc. Item, il re andava temporizando l'andata im Bergogna, per la venuta di Franza in Italia.
     
      Di Hongaria, da Buda, di Vicenzo Guidoto, secretario. 0 da conto. Zercha il cardinal Ystrigonia, ringratia la Signoria quello l'ha operato zercha il patriarcha di Constantinopoli, che 'l cardinal renonciava perchè fosse di esso Ystrigonia, a complacentia di la Signoria; tamen il papa non ha voluto, sì che aspeterà uno altro papa. Item, zercha i danari etc. Nota l'orator hongaro partì di qui; e fo fato le letere di cambio di ducati 4000.
      Et pur, cazado li papalista, sier Domenego Pixani, el cavalier, avogador di comun, venuto orator di Roma, referì la sua legatione, copiosa. De aetate pontificis, annorum ..., colerico, à do egritudine: gote et Franza; à mal animo contra la Signoria nostra.