Di Elemagna, fono letere secretissime. Il re va a la volta di Fiandra; et vidi una letera, la qual qui soto sarà la copia.
     
     
      Sumario di una letera, di sier Piero Pasqualigo,
      dotor et cavalier, orator nostro in Alemagna,
      data a dì 8 marzo, a Geno.
     
      Come veneno lì ne li zorni passati; et subito zonti, fo a una solene messa con la cesarea majestà, et post prandium se ritrovò a veder investir el vescovo de Arzentina noviter electo, che fo acto solennissimo. Era una sala tuta a torno fodrata d'oro veludato; et la cesarea majestà vestita in forma imperatoris soto uno baldachim d'oro, sentata alla in sedia. Havea in testa la corona imperial, che val un pozo d'oro, et in dosso el camiso, cento como un prete, et sopra quello l'habito da epistola, et sopra quello l'habito da evangelio, et sopra quello un pivial d'oro soprarizo, cargo di zoje. Havea sul pecto 3 crose grande, l'una de safili, l'altra de rubini, et quella de mezo di diamanti im ponta, de summa perfection et splendor. Ciaschaduna de queste 3 crose havea 22 perle tonde intorno, grosse como cesere. L'orator dil papa li sentava da una banda, et lui orator veneto nostro da l'altra. Davanti erano assaissimi principi: el conte [37] palatin tenia in man el mondo, ch'è una bala d'oro, con una † in zima elevata, carga de zoje; el marchexe de Brandeburgo tenia el sceptro imperial, la ponta del qual era tutta ornata de zoje; el principe de Aynalt, in loco dil re di Boemia, serviva de corona; l'orator dil duca di Saxonia tenia la spada, che ha el manego, longo molto, d'oro massizo, ornatissimo de belle zoje; el conte de Fustimberg tenia la vazina, tuta piena di rubini, che mai si vide la più bella cossa.