A San Marco si monstrò il sangue miraculoso a le scuole; a hore 3 fo compito, che prima stevano tuta la note a monstrarlo.
     
      [1507 04 02]A dì 2, fo il venere santo. Predichò a San Marco fra' Hironimo Magnan, padoan, predicha a San Moisè. Fo letere di Elemagna.
     
      [1507 04 03]A dì 3, fo il sabato. Fo letere di Roma, di sier Zuan Badoer, dotor et cavalier, orator nostro, di l'intrar dil papa; il sumario scriverò poi. Item, fo letere di Ferara, di la morte dil signor Sigismondo da la cha' di Este, fo fradello dil ducha Hercules di Ferara, molto repentinamente; il modo scriverò di soto; havia anni ...
      In questo zorno fo vento, et commenzò a piover, che zà più mexi non havia piovuto, et era grandissima carestia di aqua per la terra, per li boni tempi andava.
     
      [1507 04 04]A dì 4, fo il zorno di Pasqua. Da poi disnar predichò a San Marco domino Bernardo Zane, arziepiscopo di Spalato, in rocheto, con la stolla, e fè degna predicha. Et per il tempo a pioza il principe non andò con le cerimonie a San Zacharia a udir vesporo, ma ben si levò per andar, e ussito di chiesia ritornò a vesporo a San Marco, che zà molti anni più li principi non sono restati di andarvi, dove era il perdom di colpa e di pena. Portò la spada sier Zuan Corner, va capitanio a Bergamo; fo suo compagno sier Zuan Batista Bonzi; et non vi fu zudexi di propio.
     
      [1507 04 05]A dì 5, luni di Pasqua. Da poi la matina, intrò li savij dil conseio electi: videlicet sier Domenego Trivixan, cavalier, procurator, et sier Alvise Venier; sier Marco Antonio Morexini, cavalier, procurator, era amalato, tamen vol intrar.