Di Bergamo, di sier Michiel Navajer et sier Alvixe Zorzi, rectori. Dil far di 200 provisionati, et mandati in Caravazo et altrove; et esser stà cavà le fosse dil castello, qual al tempo di sier Zuan Antonio Dandolo fo cavà per la Signoria, hora li homeni l'ànno cavato; et altre provisione, e custodia mandata in Geradada.
     
      Di Caxal Mazor, di sier Francesco Duodo, provedador. Dil zonzer lì la mojer fo di re Fedrigo, vien di Franza con do fioli, et ... persone; la qual passa Po, va a uno castello, nominato San Colonban, è di la sorela di Gonzaga, dove vol star e fenir la sua vita.
      Fo disputato certa materia, pur cazadi li papalista. Parlò sier Piero Lando, savio a terra ferma, sier Antonio Trun et sier Domenego Trivixan, è procurator. Et non spazada la materia, fo rimesso a dimam.
     
      [1507 04 27]A dì 27. Fo etiam pregadi, et fo compito la materia. Parlò sier Piero Vituri, savio a terra ferma. Et fu posto parte far certo numero di schiopetieri etc.; fu presa. Item, spazar per colegio certi capitoli di Bergamo; et fu presa.
     
      Di Ferara, dil vicedomino, di 22. Come era stà notifichata la morte dil duca Valentino a la sorela, madama Lucretia, per fra' Raphael, qual à predicato lì questa quaresema; la qual monstrò gran dolor, tamen con costantia et sine lacrymis. Item, il duca havia scrito, voler restar con la christianissima majestà a l'impresa di Zenoa, cussì pregato da soa majestà.
     
      Da Roma, di 23. Come a dì 25 si aspectavano li oratori dil catholico re, per la investitura. Item, il papa voria che le cosse di Zenoa si aquietasse; et di coloquij con l'orator nostro, col qual conferisse.