In questi zorni ritornò sier Marin Griti, venuto capitanio di Ravena, et referì in colegio, justa il solito.
     
      Etiam vene sier Valerio Marcello, venuto governador di Monopoli, qual di comandamento di la Signoria, consignato l'ave il rezimento al suo successor, andoe a Brandizo a far processo contra sier Nicolò da Mulla, governador lì, et soi oficiali etc., dove stete zercha ... mexi. Et venuto qui, fo in colegio, referì; et quello sequirà dil suo syndichato da poi sarà scrito.
     
      Item, per deliberation di capi dil conseio di X, fo bandito le maschare, in execution di la parte presa nel conseio di X; che pur al presente, licet non fusse carlevar, a noze erano assaissime maschare.
     
      [1507 04 30]A dì ultimo april. Fo consejo di X, con zonta di colegio e altri. Feno li capi per mazo: sier Francesco Nani, sier Francesco Tiepolo et sier Beneto Sanudo, stati altre fiate.
      In questa matina in Rialto, per via di zenoesi, per uno zenoese venuto per stafeta, se intese come, a dì 27, francesi fono a le man con zenoesi a presso Zenoa, a certo bastion a San Piero in Arena; et combatuto, zenoesi fono roti, morti zercha 300 zenoesi; unde quelli di la terra, visto non poter resister, mandono al roy 4 ambasadori per capitolar, la nome di qual sarano notà qui soto, a dar Zenoa a la christianissima majestà a soa descrition. E il re li aceptò, dicendo faria cossa che staria ben; et havia mandà zente dentro, et soa majestà a dì 28 dovea intrar.
     
      La nome di oratori zenoesi al re di Franza.
     
      Stephano Zustignam,
      Antonio Sauli,