Item, si ave per la nave Tiepola, vien di ..., aver dato lengua a la galia sotil, soracomito sier Hironimo Capelo, ritorna di Alexandria, come quelle cosse al Cayro col soldan erano aconze; sì che di zorno in zorno si aspeta aviso de lì.
     
      In questo zorno in do quarantie, criminal et civil vechia per el piedar di sier Jacomo Barbaro, olim auditor nuovo et synico, mandato a Cervia, fu preso, da poi assa' disputation, di procieder contra sier Zuan Alberto Contarini, fo potestà a Zervia, per manzarie fate etc. Ave 37 di sì, 10 di no, 24 non sinceri. Fu posto 4 parte; et fu presa quella di consieri, videlicet che 'l ditto sia bandizà perpetualmente di tutti i officij di Romagna et rezimenti. Item, 5 anni di officij e beneficij di la Signoria nostra, sì dentro come di fuora; et debbi pagar quello sarà justifichà et sententià per il synico, havendo apelation per mexi do a li avogadori, excepto di le cosse confesse. Item, sia publicà nel primo mazor consejo et in la cità di Zervia.
     
      [1507 05 15]Adì 15. Fo pregadi. Et leto le infrascripte letere:
     
      Di Cypro, di sier Christofal Moro, luogotenente, et consieri. Zercha quelle occorentie. Et come di formenti dubitaveno non saria cussì bona saxon, perchè im parte de l'isola zà havia comenzà a venir le chavalete etc.
     
      Di Napoli, di li oratori nostri. Avisa, come [76] il re havia diliberato partirssi per ritornar in Spagna. Aspectava le 4 galie mandoe versso Zenoa in favor di Franza, le qual con altre galie, preparate lì a Napoli, che sarano numero 15, et ... barze, passerà in Spagna; et dia montar su dita armada, a dì 20 mazo, capitanio Piero Navara.