Da poi disnar fo colegio di le aque, e terminono tandem averzer la Brenta, juxta la diliberation alias fata. Et nota, è capi dil colegio preditto sier Hironimo Duodo, sier Hironimo Querini, sier Marco Antonio Loredan.
     
      Noto, a dì 20 fo preso im pregadi una parte, et a dì 24 poi in gran consejo, che le gratie, de caetero si dimandarà in quarantia, non se intendi presa, si la non haverà 36 ballote, ut in parte. Ave prima, in pregadi, 5 di no, 152 de sì; poi in gran consejo, 132 di no et 929 de sì. E fu presa.
     
      È da saper, a dì 26 dito, justa la parte presa im pregadi, fonno trati XX savij di quelli dil consejo di pregadi, et cinque di rispeto, sora le vendede di le cazude, et siano per tre mexi, et si redugino tre matine a la setimana, luni, mercore et venere, et siano tre presidenti più vechij.
     
      [1507 05 28]A dì 28. Fo pregadi. Et leto le infrascripte letere, videlicet:
     
      Da Constantinopoli, di sier Lunardo Bembo, baylo, di XI april. Avisa quel signor haver expedito uno suo in Dalmatia, per restaurar i danni fati a quelli de Sibinico et Traù; per il che è stà optima demonstration di voler mantenir la pace. Item, el signor havia fato decapitar certi corsari turchi, fono presi per quelli di la sua armata senza le fuste. Item, erano stà recuperati sopra la Natalia cercha 500 [82] schiavi christiani, qualli sarano restituiti; et ultimo aferma la bona mente dil signor e de li bassà in conservar la pace con la Signoria nostra.
     
      Da Napoli, de li tre oratori nostri, di 20 et 22. El catholico re non era ancor partito per Spagna, ma era omnino per partirssi circa finem praesentis mensis con nave 15 et galie 16, capitanio Piero Navaro, et etiam alquante fuste.