Apropinquate le galee del catholico re a queste altre, et salutate una cum l'altra cum bombarde, ut solitum est, se acostorono a tera, ad una villa distante per miglia 7, la qual se chiama Avarazo. Montorono i reverendissimi cardinali, et quelli altri signori, su la galia del re, a reverir et aceptar sua majestà, et lì firmati disnorono. Da poy a hore III se moseno per vegnir de longo; il che facendo, et essendo distanti per miglia 3, fato noto al christianissimo re, montò sua majestà a cavalo, acompagnata dal nostro ambasador, et da i marchesi da Manthoa, Monphera' et Rotolin, et monsignor de Dunoys, et dal resto di altri baroni erano stati in tera. Da la guardia sua circondato, era sua majestà su uno cavalo zaneto, vestito de veludo cremesin, et soto uno sagio de restagno d'arzento; et vene fino al pontil, dove era preparato el desmontar per la catholica alteza; el quale fu fato su la rena et a la porta. Desmontata da cavalo, sua majestà stete aspetar el venir de dite galie per spacio de una hora, venivano a remi una driedo l'altra. La prima era quella del re, la qual haveva la coverta del castello strichata de pano d'oro e damascin biancho; a torno de la galia erano pani pur strichati roso e zalo; i galioti etiam loro vestiti a quella guisa. Le altre galie havevano le coverte de pano, pur strichate cum le arme del re. Acostata la galia al pontil, lo christianissimo re, essendo in cavo del pontil, fece segno de voler montar su la galia. Il che inteso, el catholico re li fece dir che non asendese; tamen sua majestà volse assender.