Item, si dice che 'l re di Ragon non era zonto a Saona, et andava di longo in Spagna, sì che 'l roy toria la volta di Liom; perhò essi oratori dimandavano licentia di repatriar. Item, col re era andato la sua corte.
     
      Di sier Zacaria Loredam, capitanio di le galie bastarde. Dil caso di la nave Veniera di Candia, naufragò etc., qual lui l'ajutò. Et scrive il successo, come ho scripto di sopra.
     
      Dil Zante, di sier Donà da Leze, provedador. Il successo di dita nave in porto, qual l'à 'jutata, et con spexa di ducati 51 solum, ita che è stà recuperada; il cargo noliza una altra nave, sì che non si averà danno, excepto il sal etc.
     
      Fo posto le parte dil condur le zente d'arme. Parlò questi: sier Lunardo Grimani, sier Alvise da Molin, consieri, sier Francesco Trun, savio dil consejo, et sier Lunardo Mozenigo, savio dil consejo, sier Hironimo Querini et sier Domenego Pixani, el cavalier. Sier Vicenzo Valier volea parlar, ma li fo tolto il locho. Et tandem fu preso di condur 4 nostri subditi, con 40 homeni d'arme l'uno, videlicet domino Anzolo Francesco da Santo Anzolo, da Crema, alias condutier nostro; Agustim da Brignan, da Brexa, fo ...; Zuan di Pedemonti, di Verona, qual più non à 'uto conduta; et Francesco Beraldo, alias condutier nostro, e fu casso, et è padoam. Item, conduseno domino Jacomo Secho, da Caravazo, con homeni d'arme 100, et domino Lucio Malvezo, ch'è a Bologna, con altratanti; ma questi do ultimi fo comandà credenza.
     
      È da saper, li zenthilomeni andono a Mestre, o ver a Mergera, contra li oratori dil re di romani; e non veneno, ma ben veneno il zorno sequente, sabado, a dì 19 dito.