Di Saona, di sier Antonio Condolmer, orator. Dil zonzer il re di Franza li, a dì ... zugno, et esso orator scrive l'ingresso. Quando il re di Ragom sarà lì, non sa 0; et l'aspecterano.
     
      Di Elemania, da Costanza, di l'orator. Zercha la expedition per Italia; e il re desidera aver presto la risposta di la Signoria.
     
      In questo zorno, in pescharia, per decreto di cai dil conseio di X, qualli sono sier Zacaria Dolfim, sier Hironimo Capello, sier Francesco di Garzoni, fo retenuto, per uno capitanio dil conseio di X, sier Hironimo Mozenigo, quondam sier Lorenzo, incolpado per monede falsse. E tochò il colegio a questi: sier Lunardo Grimani, consier, sier Andrea Trivixan, el cavalier, avogador, sier Francesco di Garzoni, cao di X, et sier Piero Morexini, inquisitor. Qualli, retento questi, veneno zoso di pregadi a examinarlo a la camera dil tormento; et fu examinato etc. È da saper, tutta la terra fo piena, sier Piero Trivixan da la dreza, compagno dil dito Mozenigo, esser intrigato; et che li oficiali el volse pigliar, e lui scampò in chiesia di Frari. E con effecto fo, ma non fo per questo, ma per debito; sì che poi 0 fu. Etiam fo incolpato Z ..., fiol dil quondam Zuan Frescho Baldi, fiorentin, olim richissimo mercadante; el qual poi, per diliberation dil conseio di X, hessendo absentado, fo chiamato su le scale di Rialto. Questo, perchè vien dito el Mocenigo incolpò ditto Baldi averli dato quelle monede che 'l spexe, che fo falsse.
     
      [1507 06 30]A dì 30. La matina, li tre oratori dil re di romani fonno a la Signoria, ad udir la risposta zercha dar il passo al suo re, che vol venir in Italia armato etc.; et li fo lecto, de more, la risposta dil senato.