Fo fato uno savio a terra ferma, loco dil Malipiero refudò, sier Marin Zustignan.
     
      [1507 07 04]A dì 4. Fo gran consejo.
     
      [1507 07 05]A dì 5. La matina in 4.tia criminal, intervenendo il serenissimo e la Signoria, fo provà dil mazor consejo sier Donà Dandolo, quondam sier Zuane, di Candia. Ave 29 di sì, 8 di no, 5 non sinceri.
     
      Da poi disnar fo ...
     
      [114][1507 07 06]
      Adì 6. Fo pregadi. Et fo leto le infrascripte letere: Di Saona, di oratori, Condolmer et Moro. Come, da poi stati insieme li re Franza e Spagna in diverssi coloquij, e il cardinal Santa Praxede, legato, qual trata far liga contra infedelli, a dì 2 partì il re di Spagna per Spagna, et a dì 3 partì il re di Franza, va im pressa a Lion, per far provision di zente e danari per la venuta dil re di romani in Italia, qual vien con le arme, suo inimico; e va per la via de Salucia. Il cardinal Santa Praxede va a Zenoa, e monterà su le galie l'aspeta, e ritornerà a Roma; el marchexe di Mantoa torna a Mantoa; el gran maistro torna a Milan a far provision. Sier Antonio Condolmer vien in Aste, dove à lassato le sue robe, e de lì anderà a Lion; sier Cabriel Moro, el cavalier, vien per terra, qual ha la licentia a ripatriar.
     
      Da Milam, dil secretario più letere. Di preparamenti si fano; e francesi mandati versso Belinzona, dove vien fortifichato li passi. A Milan si fa descrition di zente, et le vituarie si porta in castello e Milan. Item, si manda alcuni milanesi in Franza, per sospeto; altri retenuti, per straparlar.
     
      Di Pavia, di sier Domenego Trivixan, el cavalier, procurator, et sier Pollo Pixani, el cavalier, oratori nostri.