In questo zorno fo expedito, in do quarantie, la retention di la fia fo di sier Antonio Erizo, procurator, incolpada aver robà danari a la morte di sier Hironimo Morexini da Lisbona, so cugnado; la qual è stà più di uno anno retenuta in caxa dil capitanio di le prexon. Parlò sier Hironimo Querini, olim avogador; li rispose domino Rigo Antonio; poi sier Antonio Zustignan, el dotor, olim avogador; e li rispose domino Bortolo Dafin, dotor, avochato. E posto da poi disnar, per li avogadori la parte di procieder: 40 di no, et 11 di sì. E fo asolta.
     
      In questi zorni, a San Zulian morite una grecha signora, stava in questa terra, di più di anni 100; fo fia di ..., qual era a Constantinopoli, a tempo di l'imperador Paleologo, in gran stato. Questa havia più di 100 anni, et morì verzene. Fo posta con una zoja di verdure; era richa.
     
      [1507 07 09]A dì 9. Fo colegio di savij. Et fo frustrà per marzaria tre femene, qualle haveano dormito con turchi etc.
     
      [1507 07 10]A dì 10, La matina vene in colegio sier Domenego Trivixan et sier Pollo Pixani, oratori, ritornati da Milan dal re di Franza. E il Pixani referì justa il consueto; rimessi al pregadi.
     
      Da poi disnar fo pregadi. Et leto le infrascripte letere:
     
      Di Germania, di Costanza, di l'orator. Il re aspeta la risposta.
     
      Di Cao d'Istria, di sier Nicolò Trivixan, podestà et capitanio. Di preparamenti di zente di sopra, elemane, per la venuta dil re in Italia.
     
      Di Roma. 0 da conto. Di una letera à scrito il re d'Ingaltera al papa, voler andar contra infideles; averò la copia.