Et alia, ut in litteris.
     
      Fo provà li patroni di le galie di Alexandria.
     
      Fo posto, per li savij, taja a uno Zuan di Ragusi, qual à menà in colfo le fuste di Porto Venere, ducati 500, ut patet in parte, chi 'l prenderà e darà in man di la Signoria nostra.
     
      Fu posto parte varie, per quelli di colegio, zercha proveder a le cosse maritime; et sier Lunardo Grimani, el consier, parlò do volte et otene. Parlò sier Antonio Trun, sier Domenego Trivixan, cavalier, procurator, savij dil consejo, et sier Carlo Contarini, savio ai ordeni, et sier Pollo Pixani, el cavalier, savio dil consejo. Or fu preso, che sier Francesco Arimondo, capitanio di le galie dil trafego, vadi via; con il qual va l'orator dil soldan, Tangavardin, et debi presentarsi a Corfù. Item, tutte nave et navilij, vanno fuora, tochino Corfù. Item, si mandi li arsilij, come fu preso, a tuor li stratioti, su li qual si mettino 400 fanti, parte per Corfù et parte per Napoli di Romania etc. Et cussì la matina fono expedì do contestabeli, Jacometo da Novelo, con 200 fanti, et Maldonato spagnol, con 100.
     
      [1507 07 24]A dì 24. La matina seguite: prima morite Alvise Manenti, secretario dil consejo di X, di età di anni ... Havia optima fama; et saria stato canzelier grando, si l'avesse vivesto, judicio omnium.
     
      Ed in questa matina, hessendo reduto il colegio in gran consejo, accidit, cossa assa' notoria, che sier Carlo di Prioli, fo di missier Constantin, mio cugnado, mal consejato, havendo, zà più di 18 mexi, fato una promessa a sier Lunardo Grimani, consier, di lire 45 di grossi, per domino Thadeo da la Motella, condutier nostro, per tanti zenzeri beledi, a ducati 20. e fo una zivanza, sanser Zuan Bindi, et hessendo passà il tempo di fevrer in qua, dimandando il Grimani al Prioli li soi danari, e lui minime volendo pagar, andò ditto sier Lunardo a li consoli, cassier sier Bernardim Badoer, e levò sovenzion contra el dito Prioli.