Item, dil zonzer di do oratori francesi stati qui, et domino Michiel Rizo amalato. Nota, che il cardinal Santa Praxede a Zenoa, volendossi interponer in pacifichar nobeli con populari, par quelli francesi l'intese e li fe' gran paura, dicendo feva mal a muover tal cosse. Et lui rispose, non feva cossa contra la christianissima majestà, ma per ben di soa majestà; et cussì volse partirsse subito, e montò su uno bragantin, e andò a trovar le galie, che erano alquanto lontan di Zenoa.
     
      Da Liom, di l'orator nostro. Come il re e Roan à saputo la risposta da la Signoria fata a li soi oratori qui; et come il re fa provision grande, et spera, imo è certo, aver 4 cantoni di sguizari.
     
      Da Riva, di sier Marco di Renier, provedador; et da Roverè, di sier Zuan Francesco Pixani, podestà. Zercha movimenti di sopra. Et come è fama, l'orator nostro esser stà licentià dal re di romani.
     
      Fo leto le opinion di savij, zercha la risposta da esser fata a li oratori dil re di romani, o, per dir meglio, al re proprio, zercha quello vol far la Signoria etc. Parlò sier Antonio Trun, savio dil consejo, sier Marin Zustignan, sier Zorzi Emo et sier Alvixe di Prioli, qual non compite. Et fo rimessa a doman.
     
      [1507 08 18]A dì 18. Fo etiam pregadi. Et fo sollo una letera di Palermo, di Ulixes Salvador, zercha barze di corsari è di lì via; e à dà aviso a le galie di Fiandra etc., ut in litteris.
     
      Fo disputato le opinion di eri, et expedito. Parlò sier Nicolò Michiel, dotor, cavalier, procurator, savio dil consejo, sier Francesco Trum, sier Alvise da Molin et sier Alvixe di Prioli: et fo presa.