Or, messeno di retenir il prefato sier Pollo e colegiarlo etc. Nel mandar di la parte, sier Marco Antonio Loredan, è di la zonta, contradixe dicendo si dovea andar per via di capitoli, et laudò ditto sier Pollo quando l'era in Alexandria. Qual à de intrada ducati ... in Cypro; et non ha fioli, è liberalissimo etc. Li rispose sier Lorenzo Orio, dotor, et ben. Andò la parte: 15 di no, 33 non sinceri, 108 di la parte; e fu presa. E cussì a dì 9 ditto si apresentò a le presom, licet il zorno sequente si voleva apresentar. Et fu posto in caxa dil capitanio.
     
      [1507 09 02]A dì 2. Da poi disnar fo conseio di X.
     
      [1507 09 03]A dì 3. Fo pregadi. Et leto le infrascripte letere, videlicet:
     
      Di Elemagna, da Yspurch. Come l'orator nostro à 'uto la nostra risposta. Et il re era andato a la caza, et ordinà niun per 3 zorni li dagi molestia; perhò havendo mandato Anzolo Trivixan, suo secretario, dal re, et per dimandar che l'orator li parli. Item, che è stà cargà su charete 5 pezi di artilarie per Italia, et uno 6.° si dovea butar; sì che le cosse vanno a la longa. Item, solum è con soa majestà l'orator dil papa, domino Constantin Arniti.
     
      Da Roma. Come le cosse di vescoadi è conze, e si aspetta li danari per le 'nate e le fidejussion lì in Roma etc. Item, il cardinal Sancta Praxede era amalato.
     
      Di Verona, di sier Alvise Malipiero, podestà, et sier Francesco Bragadim, capitanio. Dil zonzer dil reverendissimo cardinal Sancta †, va legato in Alemagna, a dì ... Li andò contra il capitanio et il reverendissimo cardinal Corner, episcopo de lì; e lo volse alozar in vescoado con persone 160, zoè cavali 160, a so spexe, ben li rectori li feno presente di zercha ducati 25, sì che dito cardinal si à portà ben; e stè la sera, e la matina partì per Trento.