El qual provedador da esser electo, possi esser electo di ogni oficio e rezimento etc. Fu presa: 54 et 146.
     
      Fu posto, per li savij ai ordeni, che sier Zuan di Garzoni, va patron in Alexandria, per soe urgente facende possi dismontar in terra in Alexandria, licet la parte di l'incanto non el voglij. Et sier Thadio Contarini, savio a terra ferma, messe fusse etiam dato questa licentia a li altri patroni; poi si tolse zoso. Andò la parte ave 80 di no, 90 di sì; e fo stridà presa.
     
      [1507 09 11]A dì 11. Fo consejo di X con zonta.
     
      [1507 09 12]A dì 12. Gran consejo. Posto la parte per i consieri, elezer il provedador di l'armada, come è stà preso im pregadi; et è cossa nova. Fu presa: ave 54 et 904. Et fo electo per scurtinio sier Hironimo Contarini, fo provedador in armada, quondam sier Francesco, qual è capetanio a Ravena; el qual aceptò.
     
      Fu posto per li consieri, atento il pocho salario dil zudega' di examinador, che li presenti zudexi et li futuri, che per tempo sarano electi, habino quel medemo salario che hanno li zudexi di mobele, videlicet ducati 10 a li camerlengi. Ave 117 di no, 807 e più di sì. E fo presa.
     
      [1507 09 13]A dì 13. La matina sier Daniel di Renier, venuto podestà di Chioza, fo in collegio, et referì justa il solito.
     
      [149] A dì 14. Da poi disnar, havendo sier Pollo Barbo, procurator di la chiesia di San Marcho, zerchato di spazar il santuario, dove si tien le zoje in la chiesia di San Marcho, qual era molti anni che di quello non era stà usà diligentia, solum di le zoje che si mostra etc., et hessendo un casson vechio serado, nè si trovava chiave, terminono romperlo et veder quello era dentro; et cussì fo fato di hordine dil colegio.