Di Palermo, di sier Pelegrin Venier, quondam sier Domenego, consolo, di 5 avosto. Come di lì via è barze 4, capo Piero Navaro, qual va a' danni di chi mancho pol, e de' venitiani, et maxime contra le galie di Barbaria.
     
      Di Elemagna, da Yspruch, zoè di Alla. Scrive l'orator, ch'è mia ... de Yspruch, come il secretario è stato lì da esso orator; et coloquij abuti zercha la venuta dil re. Par, ut supra, a San Gallo se intenderà, ch'è a dì ... octubrio.
     
      Da Liom, di l'orator. Come el re è a Bles; e lì a Lion è il cardinal Roan e la corte, qual fa ogni cossa, monstra gran amor a la Signoria.
     
      Fu posto, per li savjj di colegio, che sier Hironimo Barbarigo, di sier Antonio, atento fo mandà per lui, hessendo soracomito, et asolto poi, per aver levà don Alfonxo, che horra è ducha di Ferara etc., che 'l possi iterum armar per 6 mexi. Et fu presa.
     
      [156] Fu posto per li savij ai ordeni, che sier Hironimo Capello, soracomito, qual à una galia mal conditionata e cativa, la possi cambiar, e vengi fino a Zara, e li sia mandata una altra. E fu presa.
     
      Fu posto, per li savij, far gratia a li frati di San Salvador debitori di decime ducati 200, di pagar in tempo, atento i fabrichano la chiesia. Sier Tadio Contarini, savio a terra ferma, contradise; et li savij non volseno mandar la parte.
     
      Fono electi 3 savij dil consejo, ordinarij: sier Alvixe da Molin, sier Lunardo Grimani et sier Piero Duodo, con titolo; soto, sier Marco Antonio Morexini, cavalier, procurator. Item, 3 savij di terra ferma: sier Hironimo Querini, sier Alvise di Prioli et sier Francesco Orio; sotto, sier Piero Vituri, con titolo.