Et sier Luca Zen, procurator, andò in renga e contradise; et li rispose sier Antonio Trun, procurator. Poi sier Lorenzo di Prioli, consier, parlò e messe voler la dita parte, con questo, siano balotadi tutti li electi da anni 5 in qua, e il colegio li baloti. Li rispose sier Polo Barbo, procurator, laudando uno Jacomo Draganello, era capitanio di la piaza, qual noviter per esso sier Polo Barbo era stà electo gastaldo di la procuratia, in loco di Martin Saraton era morto; dicendo, licet li soi non siano venitiani, lui è da ben etc. E compito, etiam sier Marco Antonio Morexini, procurator, parlò in cao dil banco, per esser mal conditionado e non poter quasi andar in renga, contra questa parte, e laudò la eletiom dil Draganello; et fo mal inteso. Et sier Lorenzo di Prioli conzò la soa parte: da anni 8 in qua; acciò etiam fosse balotà Polo di Rizardo, ch'è 7 anni sier Nicolò Mozenigo lo elexe, qual non venitian li soi etc. Andò le parte: 2 non sinceri, 18 di no, dil Trun 74, dil Prioli, che vuol la parte con la zonta, 97. E questa fu presa.
     
      Fo fato scurtinio di uno savio a terra ferma. Et rimase sier Piero Vituri, fo savio a terra ferma, el qual ...
     
      [1507 10 16]A dì 16. Fo pregadi etiam. Et leto le infrascrite letere:
     
      Di Cypro, di sier Christofal Moro, luogotenente, et consieri. Zercha biave, et l'aqua di la Costanza, e altre occorentie.
     
      Di Damasco, di sier Tomà Contarini, consolo, di luio. Nove di Sophì non vere: che 'l sta nel [163] suo paese. Item, come sier Francesco Morexini, quondam sier Piero, merchadante lì, li à dito vilania, e che l'à manzà ducati 4000 di cotimo; unde esso consolo à fato processo, et lo manderà a l'avogaria.