Et hè tanto el nome suo, che da diverse parte concoreno una extremità de brigade per vederlo et seguitarlo, tamquam missus a deo. Et occultamente ha visto levarse molti de la Caramania, subditi del signor turcho, per andar a trovar esso signor Sophis, tanto hè el nome suo reverido e desiderato. In modo che, dubitando el signor turcho de la potentia del dito Sophis, vedendo esser cussì vicinato a li luogi soi, ha fato gran preparation de zente da pe' e da cavalo, per andarli a l'incontro. Et che per alguni zorni, avanti lui missier Priamo partisse dal Cogno, ogni zorno infallanter sopravegniva a quel signor uno e do ulachi, che dovesse star aparechiato con le sue zente. Et che per zorni 7, avanti el partir suo de lì, per comandamento ultimamente ebe, dito signor feze levar el bassà de la Caramania con cavali X milia, pagati per el gran turcho, et pedoni 5000, pagati per el popolo; et per tutti altri luogi de la Natalia, per simel comandamenti, tutti altri bassà, et el fiol propio del signor, che hè in Satalia, cavalcavano con zente da pe' e da cavalo, e tuti se reducevano a le parte de Anguri, Cassaria et Maxia. Con le qual zente etiam cavalcava belyarbei, capitanio zeneral de le zente de la Natolia; adeo che divulgavano sariano, tra cavali e pedoni, da persone 80 milia. Et per indubitato se teniva, erano per [167] afrontarse con le zente del signor Sophis, el qual prosequiva l'impresa sua et vegniva avanti. Et per quanto se diceva, el signor turcho haveva dà ordine ai suo' capi et governatori, che, pervenuto ai confini, dove se diceva trovarse el signor Sophis, volendo quello procieder avanti, dovesseno subito quello avisar, et aspetar novo comandamento: qual era, dovesse far fati.