Et non vegnando più avanti, dovesseno tuor l'imprexa sopra Anaduli (per imputar quello esser stà causa de haver allecto et inducto el dito signor Sophis vegnir tanto avanti, et tuor le arme contra el signor turcho) e debellar quello, con ajuto e socorso del signor soldam, el qual se dicea mandar a tal expedition 5000 mamaluchi; et questo per confinar dito Aliduli con l'uno e l'altro potentato. Dicevase etiam, el signor Sophis dovea redurse con le zente sue a uno loco, nominato Arzingnam, che hè dentro de li confini del turcho; dove havea destinato far una forteza, e lì fermar la sua sedia, per aver più facilità ad invader el paexe del turcho, e per aver reduto a salvarse in ogni advento. Et tiense per indubitato, fermandose esso signor Sophis in Arzingnan, tuta la Caramania et altri luogi et paesi circum circa se reduriano a la devotion de esso Sophis, per esser inclinatissimi a quello; tanta hè la extimation e fama di quello, per esser signor liberalissimo, et far optima compagnia a tuto homo. Et hè homo valoroso, de gran spirito et animo; et hè zovene de anni 24 in circa; e tuti li suo' seguazi portano le berete rosse, et hè nominato signor de la testa rossa. Et questo hè quanto ha possuto intender de li andamenti de le cosse del dito signor Sophis, et provision fate per el signor turcho.
     
      A dì 27 ditto.
      Per relation del patron del gripo de sier Francesco Loredan, venuto da Scandelorum, del qual luogo partite hozi. Et in questo zorno hè stà referito a' diti magnifici signori rectori, come el signor turcho im persona cavalchava a l'impresa contra el signor Sophis.