Item, eri vene in questa terra domino Piero Dandolo, episcopo vicentino, electo episcopo paduano, per venir a ringratiar la Signoria. Et à gote.
     
      A dì sopra dito, la note, morite sier Alberto Badoer, prior di San Zuane Evanzelista; il qual priora' à de intrada ducati ..., et dia tenir ... poveri. Et è eleto per quelli da cha' Badoer.
     
      [1507 11 08]A dì 8. Fo consejo di X simplice, per expedir presonieri. Et fo spazato uno visentin feva monede falsse, introduto da uno altro, che lo acusò per aver la taia. El qual etiam fo retenuto e punito per il consejo di X; e il visentin fo brusato.
     
      [1507 11 09]A dì 9, fo San Thodaro. Fo pregadi. Et leto queste letere:
     
      Di Cypro, di rectori, di ... Con nove di Sophis; el capitolo sarà notado di soto. E come haveano mandato soi exploratori al Cogno, li qual aspectavano.
     
      Dil Zante, di sier Antonio da Mulla, provedador. Alcune nove di Sophis. Et che in la Morea è restà pocha zente, tutti andati a Constantinopoli per andar in campo contra Sophì, ut in capitulis litterarum.
     
      Di Napoli di Romania, di sier Michiel Memo, retor e provedador. Avisa nove di Sophis. E zente turchesche esser partite de quelli confini, e andati a la Porta, ut supra.
     
      Da Milam, dil secretario. De occurrentiis; 0 da conto.
     
      Di Elemagna, di l'orator, di 5, da Brunich. Come era ancora lì. Et a dì ... novembrio spirava li X zorni, li havia dito quel nontio regio che restasse lì, e non havendo altra resoluta risposta di la Signoria, si dovesse partir etc., ut in litteris.
     
      Di Roverè. Avisi di spianade fate in quelle parte etc.