Item, per le motion di alemani versso Roverè, fo expediti per colegio molti fanti a Roverè et a Riva, come dirò di soto; et mandato Latantio da Bergamo, qual vadi a far li 300 provisionati a Verona, e vadi a Roverè. Et il capitanio di le fantarie, qual era andato in veronese, alozava a Isola di la Scala, fo scrito a Verona che 'l mandasse a Roverè, a sopraveder quelli passi; e li fo mandà li danari per far ... provisionati etc. Item, fono expediti 5 probi et valorosi contestabelli, videlicet il signor Piero dal Monte con 300, Sachozo da Spoliti con 300, Janni dal Borgo con 200, Buta fuogo da ... con 200, et Jacomo Albanese con 200; tamen non fo dato li danari, ma posto hordine etc.
     
      [1507 11 23]A dì 23. Da poi disnar fo colegio di savij.
     
      [1507 11 24]A dì 24. Fo consejo di X. Et vene sier Vicenzo Querini, dotor, stato orator al re di romani e da lui licentiato. El qual publice multa minabat, che 'l re di romani vegniria omnino in Italia, et con inimicitia nostra.
     
      [1507 11 25]A dì 25, fo Santa Catarina. La matina in colegio vene el prefato sier Vicenzo Querini, acompagnato de more. Stete pocho; et fo remesso al pregadi. E da poi disnar fo pregadi, et fo leto le infrascripte letere, qual fonno molte, adeo il Querini non potè referir, che tutti lo desiderava.
     
      Di Napoli di Romania, di sier Hironimo Baffo, capitanio e provedador, do letere justificatorie. Carga il collega et il provedador di l'armada stato lì, qual à messo quella terra in confusion con li galioti di le galie, ch'è stati a remor con li habitanti et occision de molti.