Et questi capi li disseno, venir come boni amichi di la Signoria, e non volevano far dispiacer a la Signoria; et si portono con lhoro 40 some di vituarie. Poi passono vicino a Brentonega, et veneno a Gusolengo, mia 7 di Verona, dove era il capitanio di le fantarie, amalato di la gamba; sì che essi todeschi feno 40 [196] mia. Item, che essi rectori non sanno che far, si dieno obviarli o non, licet a questi non se li pò riparar, perchè per campagna pono andar a Villa Francha e passar sul mantoan; et che haveano scripto al capitanio di le fantarie, venisse lì. Et voleano prima mandar domino Piero Salerno a la Chiusa; ma, poi che todeschi à tolto altra via, non lo mandorono. Item, dil recever di danari per far fanti, farano etc.; et che 'l capitanio di le fantarie ha mandato a far fanti a Mantoa, e il marchexe ha divedato li fazino. Et nota, hessendo suso pregadi, vene letere di Verona di questo tenor.
     
      Se reduse el consejo di X. Et ussiti, leseno al consejo alcune cosse secrete, in questa materia di le occorentie presente.
     
      Fu poi leto al consejo una letera, scrita questa matina per colegio a Verona, che, potendo, non li lassasseno passar etc.
     
      Fu posto per li savij, d'acordo, far 3000 fanti, soto quelli capi parerà al colegio. Item, Zuan Paulo Manfron con la sua compagnia si fazi avanti. Item, mandar ... stratioti, di quelli è in Friul, in veronese; et che 'l capitanio di Brexa vadi a Gedi dal conte di Pitiano, a dirli stagi preparato per cavalchar. Item, de praesenti sia electo uno provedador zeneral in campo, da esser electo di ogni luogo e officio, con pena di ducati 1000; habi ducati 120 al mese per spexe; meni con si cavali 10, computà il secretario; debi risponder damatina, hessendo in la terra, e, non hessendo, il zorno drio; e si parti subito.