Exurgit namque accinctus potentia Dominus salutaris noster, spes omnium finium terrae et in mari longe, turbantur gentes et timent qui habitant terminos a signis ejus. Talia quippe ac tanta, pro sua omnipotentia et pietate, in India et aliis orientalibus terris, per nostros [202] operatus est et operatur in dies omnipotens Dominus, ad christiani nominis gloriam et infidelium confusionem, ut jam mysterium operosissimae orientalis operationis nostrae, non tam ad privatum decus et utilitatem nostram, quam ad publicam christianae religionis et istius sanctae sedis exaltationem pertinere, clarissime videri possit. Excederemus profecto epistolae modum, si singula superioribus illic gesta annis percurramus. Verum, quae inde laetissima nunc nobis sunt allata, latius, ut facta sunt cognosci digna, sanctissimo Domino nostro scribimus, quorum comunem gratulationem sanctitatem suam vestris reverendissimis patribus impartituram pro comperto habemus. Ea sunt in primis, factam proxime nobis tributariam famosissimam illam Taprobanam insulam scriptisque maxime celebratam; habitam simul a nostris insignem de saracenis maritimam victoriam; et nonnullos alios de divina indulgentia successus, quibus maxime christianum nomen cum magna infidelium admiratione et terrore exaltatur in universa terra. Crederet hoc propterea senilis et superba quondam vel carthaginiensium vel romanorum potentia, cum hanc navigationem, summo tentatam conatu, ipsius difficultatibus victi destituunt; crederet orbis, cum Christi religionem ad internecionem persequitur, fore ut Christi crux, judeis scandalum, gentibus stultitia, hac navigatione quandoque peracta, gloriam imperii sui ad ultimas usque, et ipsi quoque orbi terrarum ignoratas terras latius admirabiliusque diffunderet?