[204]Comenzamento de la lettera:
     
      Sia presentata questa scritura a la presentia del tribunal del doxe, el gracioso, honorato, prudente, sapientissimo, temudo e famoso, dignissimo fra i signori, honor di christiani che adorano la croxe, doxe de Veniexia edifichada su le aque, doxe de ogni liberalità infra i fioli del batesemo, amigo de i re e di soldam, Dio el mantegna e 'l suo stado.
      Ve femo asaver, como si à presentado a le nostre Porte altissime l'ambasador vostro, magnifico e dignissimo et exelente, el qual fo im pe' davanti el nostro tribunal, con una letera del doxe. Ancora ditto ambasador disse haveva de parlarmi a bocha a bocha, e commenzò a parlar davanti el nostro tribunal. El parlar suo si è del parlar del doxe; e tutto quello che à parlado a nostra presentia, à moltiplichado più de la forma preditta. E fo quel parlar, intrò in la vollontà nostra dignissima; e perhò havemo tratato, como dignamente el merita, più di altri ambasadori. E perhò à parlado davanti de nui dignissimo: i marchadanti veneciani à 'budo assai danno de le bombarde fo tratte del Farion in la cità de Allexandria ben vardada; e quelli de Alexandria à devedado el bischoto e altre cosse; e à 'uto danno de la charestia del piper; e per avanti i soleva tuor el piper a ducati 80 la sporta, al presente se vendeva per ducati 192 la sporta; e si à renovado molte altre manzarie, e molti tortizadi di più di quello è stado mentoado, si avemo inteso. Ma, per quanto aspeta a le bombarde e le cosse trate del castello ai merchadanti veneciani i mentoadi, però è consueto per usanza continuamente.