Essendo zonto [208] l'honorato imbasador vostro a la presentia nostra con la letera de credenza, dicendo che li fosse data fede de quanto diceva, ch'era da parte de la illustrissima Signoria vostra, et consentimento de quela; e quelo havemo ben inteso, e datoli fede in quanto ne à ditto, et havemolo visto volentieri et honorato, segondo li ambasadori, a l'uxato. Da poi ne à 'visato, che li merchadanti venitiani se lamentano molto fortemente de le bombarde botade a le galie del nostro castello, anche de levar de l'aqua et altre muniziom; et che se lamentano de l'amontar del pevre, che lo solevano tor per 80 la sporta, et che adesso se paga 192 la sporta; et che avevano fate usanze nove, et de gran manzarie, et altre cosse; de che tutto benissimo havemo inteso. A lo qual respondimo: prima, de quanto ne à dito del bombardar del castello, sempre è stato uxanza, che tutti navilij che entrano nel porto de Alexandria, le galie o altri navilij de qual sorta che se voja, che, quando hanno complito le soe cosse, vano a demandar licentia a lo nostro armirajo. Lo quale dà una poliza per el signor del castello, che, dando tal poliza, nisuno non li dia impazo, et vano lhor viazo, donde che li piaxe, con licentia de tutti doy armiragij. Et le galie andorono via et abiereno lhor vele imprevista, senza demandar licentia alguna. De che in quela fiata, vedendo la fameja pocha, che era nel castello, che ditte galie andavano via et non avevano portada la poliza de l'armirajo, segondo ch'era la uxanza, li fo forzado de lassar qualche pezo de le bombarde.