De che non era in nostro pensier, ni devision de li nostri con la nation venitiana; ma devese ensir del nostro porto, cussì senza licentia a la improvista, perchè stano in nostro paese salvi e seguri, et entrano et enseno senza de demandar salvo conduto, salvi e seguri lhor et lhor persone, fioli et tutti lhor beni; che altramente, se nui, ho quelori ch'erano in nel castello, aveseno pensato che quei dovevano ensir, averano fato tal provixiom, che non fora mai ensito uno de lhori, nè de lhor navilij. Anche li maestri de l'artelaria non se trovavano in castello, quando che le galie fugireno; e per questo che stavano imprevisti, non pensando che mai contra de la nation venetiana venesse tradimento, anche quelori dal castello combatereno. Le bombarde non foreno, con qualche famejo che i non saveva de tal arte, con li bombardieri; et quelori che tochava non se trovarono: foreno imprevisti in tal horra, credendose che la nation veneciana non venerebe mai manchamento: chè, si era al tempo se trovavano li bombardieri, et quelloro che sono uxi de star in castello, nisum d'essi navilij non foreno [209] ensiti, che li averano roti. Et de quanto n'è sta dito del levar del biscoto et de altre vitualie, tal cossa non s'è stata de nostra volontà, nè de' nostri oficiali de Alexandria, se non che quelli zorni era lo morbo, che nissum non voleva desender de le galie, e, per paura del morbo, anche si nisuno moriva sopra le galie, nisum non lo osava desender in terra; et tal cossa era comandamento de Domenedio, che persona non podevano contradir in tal cossa.