Lo avemo udito volentieri, et optimamente inteso quanto in nome de vostra excelentia ne à exposto, conforme a le letere de quella per lui presentate a la Signoria nostra. Et perchè in fine del parlar suo, havendo a tratar cosse pertinente a' marchadanti, ne rechiese auditori, per poter più expressamente esprimer et dechiarir el concepto suo, a beneficio de l'una et l'altra parte, fusemo contenti deputarli tre zenthilomeni nostri, persone pratiche, degne et honorate. Qualli, essendo stati piuj et piuj volte insieme, et molto ben examinate le dificultà et controversie, ne àno referito esser rimasti d'acordo de alcuni capitoli ben neccessarij, quali per la auctorità el tien da la excelentia vostra, li ha aprobadi et confirmadi. Et de alcuni, che grandemente importano, et che, senza de essi, marchadanti, visto esser stà cussì tortizadi et ruinadi, per le raxon che se li à dicto, non se meteriano a li trafegi consueti nel porto de Alexandria, non sono venuti a conclusione nè componimento alcuno, dicendo non aver altra comissione, che certo à parsso a tutti molto da nuovo, vedando esser venuto qui uno ambasador, come è questo Tangrebardì, homo de la autorità e reputatione l'è a presso la excelentia vostra, senza tal libertà nè potere. In modo che, essendo in queste dificultà, [213] li à parso trovar questo espediente, de expedir di qui el suo caschì, et mandarlo a la presentia de la excelentia vostra con sue letere, dechiarandoli le parte restano in dificultà. Parendo mo' a quella, le averà per suo comandamento maraba, sotoscripto de sua mano, a confirmare, a ziò marchadanti rimangino satisfati, et con animo senzier possino ritornar a li trafegi usitadi, piuj presto che cerchar viazo nuovo, del qual li vien fato grandissimi partidi, quali, per esser ben noti a esso magnifico ambasador, non volemo altramente particularizar, riportandose a lui, che di tuto è optimamente informato.