Et havea mandà a dir avanti, se non voleano tuor tutto quanto insieme, dovesseno restituir tutto insieme, et dischargar tutto quello haveano chargà in li suoi navilij de ditto pevere. Quando hanno inteso di noi queste cosse, hano mandà a avisar le sue galie, che se trovava in Alexandria, doveseno partir de lì et schampar de lì, senza consentimento del nostro signor di Alexandria et dil signor dil Pharion. Et mai nel tempo passato fu fato simel cosse; et tutto questo proziede de la malitia, de la chatività di merchadanti venitiani. Et consuetudine era, che marineri doveano vender a danari contadi le sue robe, et con quelli danari comprar del pevere; et questo anno passato hanno restato de vender nè de comprar, et hanno fatto contra tutti i patti. Subito missi tutti i merchadanti mori et venitiani in zime per queste cosse; et à chadesto a lhoro quello che dovea [218] esser, da Dio, quello che niun non pol schampar, et tutte creature convien morir, et quello era comun per tutti cussì mori et pagani. Al presente, da poi che sono venuti i messi vostro e del nostro interpetre et armirajo, con ditte scriture, lamentandosse venitiani del pevere del dachieri, quello che era consueto nel taiar del prezio, et havevi scrito come uxanza era, ogni soma per ducati 80; et valea per questo prexio, segondo l'uxanza. Questa uxanza era quando el pevere valea 40 ducati, al presente val la sporta ducati 120 et più et mancho; et questa è diferenzia molto granda, per esser cussì volontà de Dio. I arzenti, franchi vendeva per 80 et 70 ducati el mier, al presente vendeno ducati 100 el mier; come volevu vuj vender el vostro per questo prexio se atrova adesso, et el nostro, nu che semo vostri defensori et governadori, et semo patroni del stado, et perchè volete vendemo la nostra roba mancho de quello la val?