Et havemo comandà, che sia scontrà le scriture et capitoli mandati de qui, con i comandamenti mandati di Alexandria lì. Havemo trovati in le scriture capitoli di piuj di quello se atrova ne li comandamenti, che hanno ditto i merchadanti venitiani, cossa senza raxon et senza sustanzia. Questo proziede da la sua malizia et chatività; et questo per occultar le sue buxie. Havemo comandà, al presente, che fusse observato i comandamenti di soldani vechij passati, et che doveseno haver executiom, senza alcuni capitoli in la scritura ne havete mandato, ne havemo risposto a capitolo per capitolo; et havemo mandato i ditti capitoli con el ditto messo, et havemo comandato che fusse scrito uno comandamento maraba et uno altro longo, a similitudine di comandamenti vechij del tempo di soldani vechij, de capitolo per capitolo et parola per parola. Et per confortar el cuor di merchadanti, e per tuorge tutte le sue scuse, la vostra serenità debia mandar a chiamar i merchadanti venitiani et farli buon cuor et avisarli, che stagino con el suo cuor senzier senza fastidio alcun, securi de la vita et de la roba, et debia andar ne li paesi consueti, secondo l'uxanza; et i consoli, che vegnino in Alexandria, debiano etiam lhoro conservar le uxanze, merchadanti et [220] fattori; et che comanda, che non debiano romper le uxanze; et che i consoli non possino star piuj de anni do in Alexandria, secondo la consuetudine; et che tutti sui navilij, che come serano zonti in Alexandria, serano securi sotto la securità de Dio et del suo propheta, et etiam sotto la nostra securtà, et da nui non è per esser molestati; et volemo observar i patti, che havemo comandà che sia comandà esser rinovati; et si niun de li nostri signori scrivani, o ver comessi, i farano despiacer alcuno, serano puniti et haverano da nui cossa ge despiazerà. Et questa è la risposta, che respondemo a la serenità del doxe.