N. 20. Che la zemichia de li consoli sia data in danari contadi, ducati 200 a l'anno, come è uxanza et apar per molti comandamenti; et sia pagato el consolo nostro de quanto el dovesse haver.
      N. 21. Che 'l vender et comprar sopra le galie et nave nostre sia libero a chadauno, nè possi esser impedito nè molestado per alguna via.
      N. 22. Che non possi esser tolto nostri navilij per forza, nè nolizadi; et ogni danno seguirà a' mori sopra navilij nostri, nè etiam forestieri, la nostra nazion non sia ubligata, nè possi aver alcun impazo.
      N. 23. Che in reparazion de li fontegi nostri che ruinano, sia comesso a l'armirajo o ver nader [224] li abiano a far conzar et fabrichar, secondo che serà bisogno per l'abitar di nostri marchadanti, sì etiam li magazeni de doana siano coperti, come è bisogno e consueto.
     
     
      Dil mexe di dezembrio 1507.
     
     
      [1507 12 01]A dì primo. Si ave, per nave di Cypro venute, di la morte di sier Alvixe Contarini, consier dil rezimento di Cypro, a Nicosia, zorni 4 da poi consigliatoli el rezimento per sier Jacomo Badoer, suo predecessor; tamen non si ave letere dil rezimento. Perhò non fo fato in suo locho. Item, si ave dil zonzer di sier Lorenzo Zustignan, luogotenente.
     
      Item, domino Zuan Laschari, orator dil re di Franza, fo a la Signoria. Al qual fo comunichato le provision fate eri im pregadi, per il passar di fanti alemani per il veronese; et le justification nostre, esser passati senza alcuna intelligentia. Et cussì fo scrito a Milam et in Franza.
     
      Da poi disnar fo colegio di la Signoria e savij, con li capi di X, sier Piero Capelo, sier Domenego Contarini, sier Francesco Foscari, el cavalier.