Avisi, che di sopra non è altre zente; et si fa una dieta a Costanza el dì de San Nicolò. Etiam fo letere da Riva, di sier Marco di Renier, provedador, di questo tenor; sì che altre zente non par.
     
      Di Feltre, di sier Alexandro Bolani, podestà et capitanio. Avisi auti da una osta vedoa, qual à parlato con certi todeschi, li ha dito che elemani non vegnirà de lì, ma dil Friul via etc.
     
      Di Udene, di sier Andrea Loredan, luogotenente, più letere; e riporti di uno Sbroiavacha, citadim di Udene, stato a Trento, soto specie di vodo al bia' Simon. Che non è altre zente, solum li 200 cavali a Burnich, et zercha 300 fanti per quelli lochi, e si aspetava di altri; et che 'l signor Bortolo d'Alviano era stato a Gradischa a veder quella e il castello. Et scrive altre particularità, ut in litteris; et domino Antonio di Pij ...
     
      Noto, era stà ordinà per il colegio, che 150 stradioti, di quelli erano in Friul, passasseno in veronese; ma, havendo inteso la Signoria esser assa' zente in veronese, revochò l'hordine.
     
      Item, in questo pregadi li savij steteno longamente a consultar con li cai. Et, poi leto le letere, veneno con le so opinion al consejo, in una materia secretissima, cazado li papalista.
     
      Et le letere da mar, di sier Hironimo Contarini, provedador di l'armada, per esser di octubrio vechie, non fo lete. Date a Corfù.
     
      Noto. In questi zorni, di Faenza, fo conduto qui uno citadin, nominato ..., faventino; qual, venuto di Roma lì, per aver straparlato dil papa etc., et altri sospeti, sier Alvise Capello, provedador, lo mandò a la Signoria, a li capi di X. Fo collegiado etc.