Item, fo conduto di Caxal Mazor uno Lodovico da Caxal Mazor, per monede; e fo colegiado. Tochò sier Lorenzo di Prioli, consier, sier Piero Capello, cao di X, sier Andrea Trivixan, el cavalier, l'avogador, et sier Alvise da Mulla, inquisitor; i qualli spesso lo examinava. Et per la soa examination sequite, come dirò.
     
      [1507 12 08]A dì 8, fo il zorno di Nostra Dona. El dovea esser pregadi, tamen non fu; fo colegio di savij. Et fo conduti di Verona 4 al consejo di X, per stado; [230] qualli sono il conte Zuan Piero dal Vermo, et uno altro dal Vermo, suo nepote, et il suo gastaldo, et sier Federico di Cavalli, quondam sier Dondade', zentilom nostro, qual à praticha in Alemagna et in corte dil re; et, come intisi, questi haveano conduti ditti fanti alemani sul veronese. Or, in diversse barche ligadi, fo menati per Francesco Lombardo, capitanio dil devedo a Verona. Et subito fonno messi in diversi lochi, im palazo et in colegio di le biave; et fo reduto il colegio, a ziò deputado, subito in camera, et sbarato il palazo. Tochò sier Andrea Griti, consier, sier Francesco Foscari, el cavalier, cao di X, sier Francesco Morexini, dotor, cavalier, avogador, sier Anzolo Trivixam, inquisitor; et li examinono, et li deteno la corda etc.
     
      [1507 12 09]A dì 9. La matina, il colegio predito si reduse in camera, sbarato il palazo etc.; e cussì l'altro colegio etc.
     
      Da poi disnar fo pregadi. E leto le infrascripte letere:
     
      Di Verona. Dil zonzer a dì 7 il conte di Pitiano, capitanio zeneral; e la so compagnia, li vien drio, è zà bona parte zonta; lui à 'lozato a Gusolengo.