Da poi disnar fo gran consejo. Fato capitanio in Cypri sier Beneto Sanudo, el consier, qual vene per scurtinio et 3 man di eletion; el consier in Cypri, in luogo di sier Alvixe Contarini, a chi Dio perdoni, sier Piero Loredam, fo podestà e capitanio in Cao d'Istria.
     
      Et la sera, a hore 3 di note, si sentì toni et lampi, cossa quasi inaudita, sì che semo a la primavera. [238] Etiam vidi ozi garofoli, et è stà visto ruose in assa' lochi; è bon inverno.
     
      [1507 12 28]A dì 28. Fo, da poi disnar, pregadi. Et leto le infrascripte letere:
     
      Da Roma, di l'orator. Manda la copia di la letera dil re di Portogallo al papa, zercha li progressi di le ixole trovate per le soe charavelle, state fino a l'ixola Taprobana, la copia di la qual sarà qui sotto notada. Et a dì 21, el dì di San Thomado, per questo fo fato a Roma solenne precessione etc. Item, che si partirà il vescovo di Tioli, vien legato in Romagna.
     
      Da Napoli, dil consolo. 0 da conto.
     
      Di Milam, dil secretario. Come sguizari erano risolti, vol esser con il re di romani, ma non contra la Signoria nostra, ni il christianissimo re di Franza etc.
     
      Di Franza, di 16, date a Roam, dove è il cardinal Roan, legato, e il Condolmer, orator nostro. Dil recever le nostre letere in justifichation, zercha il passar li fanti alemani per il nostro. Etiam domino Zuan Laschari scrisse in conformità; sì che è satisfato, et anno spazà dite letere a Bles al re etc.
     
      Di Brexa, di rectori. Alcune relation di exploratori, mandati per quelli de Federicis di Valchamonicha, di le cosse di Alemagna; e di la dieta si fa a Bolzan, qual principia a dì 6, et in quel zorno dia zonzer il re di romani lì. La qual dieta se intende di quelli dil contà di Tirol, e il re sarà im persona.