Il Trun ave 8 ballote et non più.
     
      Et se intese, che una nave zenoese, qual era carga di mori di Barbaria, magrabi, andavano in Alexandria, per numero 600, par a Rodi sia stà presa, e fato schiavi, e doble 80 milia, botte di ojo in zare 1200, telle carpete et altro per assa' valuta, richa di ducati ...; sì che rodiani, con intelligentia dil patron di la nave, ch'è zenoese, Negron, à 'uto tal butim etc.
     
      Da poi leto le letere im pregadi, fo chiamà consejo di X. Et fo preso di restar tutto il mexe di zener a far, in locho dil Zorzi Emo, dil consejo di X, atento è a' nostri servicij.
     
      [1507 12 29]A dì 29. Fo consejo di X. Fato capi di X di zener: sier Alvixe Arimondo, sier Nicolò di Prioli et sier Alvixe da Mulla; et fo con zonta. Et dicitur, sier Piero Trivixam, da la dreza, qual fo chiamà per revelation di stado et monede falsse, havia dà una scritura al consejo di X, volea salvo conduto di le monede, e presentarsi per il stado; et poi suplichava esser confinà a Padoa, dove la soa persona fusse secura da li creditori, per esser debito ducati assa'. Et non fo acetà.
     
      [1507 12 30]A dì 30. Fo etiam consejo di X. Et fo spazà do de quelli veronesi, zoè il fator e uno altro, e lassati andar; il resto fonno retenuti. Cussì etiam, dicitur, fo spazà e asolto quel faventin.
     
      Gionse e intrò do galie sotil di 6 mexi, sier Zuan Moro, quondam sier Antonio, et sier Vicenzo da Riva. Referiscono, le galie di Baruto, capitanio sier Marco Loredan, quondam sier Antonio, cavalier, procurator, sopra Sapientia aver combatù do barze di Piero Navaro, corsaro, qual havia preso 3 charavele, do di nostri subditi et una forestiera, con formenti; et quelle havia recuperate.