Nota, ditta comandaria sarà dil cardinal Corner, qual l'à 'uta per il gram maistro di Rodi defunto, confirmà per papa Alexandro in concistorio, et per questo gran maistro di Rodi presente; à intrada ducati 3000. Et ditto domino Marco Malipiero ha anni 75; et cussì a dì X, di note, morite.
     
      [1508 01 10]A dì 10. La matina intrò le galie di Baruto dentro; restò il capitanio, qual è intrado da poi, e vien con fama.
     
      Fo in colegio sier Bernardo Barbarigo, venuto capitanio di Corfù, et referì zercha quelle fabriche et quelle cosse.
     
      Da poi disnar 0 fu. Et nota, la sera a San Canzian in Biri fo fato la demonstration di la comedia di Plauto, dita Menechin. Fo bellissima. La fa Francesco Cherea; sì che più avanti in questa terra è stà fato tal demonstration, cha questo anno, per ditto Francesco; vadagna e tien in festa la terra. Fece a una festa la Asinaria, et poi egloge pastoral.
     
      [1508 01 11]A dì XI. La matina, hessendo morto il comandador di Cypri, fo gran remor in colegio per sier Zorzi Corner, el cavalier, consier, padre dil cardinal, a chi questa comandaria aspetta; e voleva mandar a tuor le robe di caxa dil ditto defunto, qual perhò era stà svudate, dicendo l'è debitor ducati 9000. Et tamen non seguite altro. Sier Pollo Malipiero, so nievo, ave tutto.
     
      Vene etiam in colegio a referir sier Marco Loredan, venuto capitanio di le galie di Baruto. Fo laudato dal principe etc.
     
      Da poi disnar fo pregadi. Et leto le infrascripte letere:
     
      Dal Zante, dil Mulla, provedador, di 15 dezembrio. Come à inteso che li turchi, ritornati in la [244] Morea, è stà per confortar li popoli, e non per esser stà roto Sophì, imo el siegue contra Alidulli.