Da Verona, et di sier Zorzi Emo, provedador zeneral. Come era partito di Verona per andar a Gusolengo, con li capi, zoè Zuan Paulo Manfron, Lucio Malvezo e il capitanio di le fantarie. Et vuol andar col capitanio zeneral nostro, ch'è a Gusolengo alozato, versso Roverè; fato gran provisione etc.
     
      Di Vicenza, di sier Piero Barbo, podestà, et sier Vicenzo Valier, capitanio. Come, havendo ricevuto letere dil magnifico provedador Emo, che li comanda immediate provedino a li passi etc., de che quella comunità, inteso questo, hanno nel suo consejo electi tre oratori, a pregar la Signoria non abandoni quella cità primogenita etc.
     
      Di Roma, di l'orator. Come, a dì 15, il papa, inteso la morte dil Malipiero, comandador di Cypri, atento che uno, per nome di la religion di Rodi, qual à obtenuto dal papa in concistorio, che niun habbi alcun beneficio di la religion, si non quelli porta la † etc., unde il papa à dato tal comendaria al reverendo domino Piero Grimani, e quella havia il Grimani, a Bologna, a sier Piero Bembo, di sier Bernardo, dotor et cavalier, a requisition dil cardinal di Urbim, el qual è in caxa dil cardinal San Piero in Vincula. Item, el cardinal Corner fo dal papa a dir a lui aspetava tal comendaria; ma 0 valse.
     
      Da Milan, di sier Francesco Corner, va orator in Spagna, di 12. Dil partir. Qual è stà molto honorato dal gran maistro, e coloquij abuti etc.
     
      Di Franza, di l'orator, date a Bles. Come, a dì 5, il cardinal Roan intrò in Bles con 400 cavali; et li vene contra 700 cavali.