E in Rialto fo fato per ditti bufoni una cria, atento erano stà mal tratadi ozi, e senza done che haveano tolto questi bazili per cenar ben a so spexe; et li impegnò, uno per torzi, l'altro a l'hostaria, dove feno una bella cena a so spexe, zoè a la hostaria di la Campana etc.
     
      [1508 01 27]A dì 27. Fo pregadi. Et leto le infrascripte letere:
     
      Di Verona, di rectori, et dil provedador Emo. Justificatiom etc. Item, deposition di exploratori. Il re di romani esser a Igna e andava a chaza, ch'è vicino a Bolzan; il cardinal Sancta † a Bolzan. Item, dil zonzer a Igna et a Trento 6000 grapelli, ch'è ferri da meter sotto i pie' a' fanti, et passar monti. Item, di zente che se ingrossa de lì.
     
      [257] Di Milam. Come a dì 25 dovea partir sier Zuan Jacomo Triulzi per mantoana, con 400 lanze et fanti 3500; et quel era stà prima deputato non vegnirà più etc.
     
      Di Franza, da Bles, ottime letere dil re di Franza et cardinal Roan. Come voleno esser a una fortuna con la Signoria, e non manchar di 0; hanno scrito a Roma, al papa, et Spagna, et fa ogni cossa, ut in litteris. Et, bisognando, il re vegnirà im persona; offerisse tutto a la Signoria. Item, dil venir lì monsignor di Anguleme, zenero di la christianissima majestà; l'orator fo a visitarlo, coloquij abuti etc.
     
      Dil cardinal Corner, da Roma, una savia letera. Ringratia la Signoria averli dà il possesso di la comandaria di Cypri; si oferisse usque ad effusionem sanguinis, come à fato li soi passati. Item, el cardinal Grimani à 'uto a mal, qual à fato domino Pietro; et lui fo dal papa, disse era stà inganato.