Di Roma, di l'orator. Come il papa, inteso le novità di Bologna, dubita non sia con intelligentia di la Signoria. Coloquij abuti con l'orator; voria la Signoria scrivesse a li nostri lochi, si mandasse a oferir al suo legato è in Bologna, bisognando.
     
      Di Napoli, dil consolo. 0 da conto. Zercha le galie bastarde, quello à fato in quelli mari etc. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
     
      Di Faenza, di sier Alvise Capello, provedador. Come, in Bologna, le dissensìom è più che mai: li Marascoti sono ussiti et andati a Ymola; li Pepoli sono su le arme; et altri soi partesani non voleno ubedir il governador dil papa etc.
     
      Fo scrito, d'acordo, in Franza una letera in risposta, ringratiando la christianissima majestà di le offerte; et altro, secreto.
     
      Da poi expedito le cosse di la terra, sier Marin Morexini, olim ai 3 savij, intrò. Et volse mandar fuora i Pexari, parenti fo di sier Beneto da Pexaro, olim capitanio zeneral; qualli andoe a la Signoria, et, non volendo ussir, fo terminà per la Signoria, ussisseno. Or poi ditto sier Marin andò in renga, stè 3 horre, et messo di retenir Sabastian Negro, fo soramasser di dito zeneral, per saper certa verità etc., atento la retention alias presa di Piero di Rizardo. Or compito, volse risponderli sier Hironimo Capello, sier Alvise Zorzi, sier Alvise Gradenigo, dicendo non doveva meter di retenirlo; et, per esser l'hora tarda, fo licentià el pregadi etc., et sagramentà el consejo, e tutti intese.