E cussì tolsse do terre grosse, abundante de victuaria, nominata una Amit e l'altra Carput, e lì disse invernarsse; et haver facto gran crudeltà, tuor done et garzoni, et amazar assai li homeni. Et dentro de [268] dicta terra de Amit, prese uno fiolo et una fia de Alidulli; sì che dicto campo del turco steva con grandissima paura, etiam el paese, per tal via, che a Tochat non ge era restà nisuno, anzi erano fuziti in sul mar, per el simel esser stato per mexi tri desabitado, et ancora tute le altre terre circumstante, con grandissima paura dicto campo, che ogni zorno li coreva et se ingrossava.
     
      Item, in el paese del caraman in te la Petra se atrova homeni da 15 milia in suso, a Idim e Lindam assaissima quantità, cha si par sia volontà di Dio che ciaschadum el dimanda.
     
      Etiam in dicto campo haver do boche de artelarie, le qual fa tirar con para 60 de buffali; amico de' christiani, inimico de la fede machometana; et haver con lui certi preti armeni, al qual ogni zorno li lezeno.
     
     
      Copia di la letera.
     
      Heri scrissi a vostra magnificencia quanto mi acadeva; havendo poi hozi havuto letere d'Alepo, ho deliberato far questa a vostra magnificencia. Et per chiarirla del tutto, hora uno anno, Alidulli, ch'è un signor in queste montagne, confina con la Soria et parte di la Turchia et Azimia, qual poco tempo, per la bontà e justicia soa, è fato potente signor, have una cità chiamata Amit, lontana zorni 6 de Aleppo a cavallo, quale se li dete da sì, et lo chiamono per signor. Quando el Sophì vene questa istade, lo la tolsse; partido poi el Sophì, Alidulli la rehave.