Disse molte altre cosse; el qual va a Roma. Or questo portò certe monede di Soffì, tra le qual una, che val ducato uno e mezo, con queste letere, qual avi, et tutto letere da una banda e l'altra, qual tradute dice cussì. Et primo:
     
      Non è Dio altro che un sol Dio,
      E Machometo messo d'esso Dio,
      Alì secretario de esso,
     
      Machometo el potente,
      Allì el posente,
      Asen el valente,
      Oscen dal bon esempio,
      Allì, fiol dil posente,
      Machometo el vitorioso,
      Chaffar el veritevole,
      Moixè el compido,
      Allì el coreytor,
      Machometo el fedel.
     
      Da l'altra banda,:
     
      El soldam justo, el compido,
      El coretor e donador,
      El vitorioso, el re Smayl,
      Beador, fio de Zien,
      El Soffì, che Dio prospera el suo regno e potenzia.
     
      E questa è stampida nel suo paese.
     
      Et nota, vidi per avanti una altra soa moneda d'arzento, di valuta di mezo ducato, con queste letere, tradute in latin dice cussì:
     
      Da una banda: Justicia et ben comune,
      Da l'altra: Pace et libertà.
     
      [1508 02 03]A dì 3. In colegio vene do oratori di Verona, domino Zuan Lodovico Faella, dotor et cavalier, et domino Andrea di Pelegrini, cavalier. Et parlò il Faella, dimostrando gran fede di quella comunità versso la Signoria nostra; ma ben suplichano, che, atento il provedador zeneral e li rectori habino adatà zercha li strami, da esser pagati per li soldati a ducati 2 il charo, et havendo fato il pagamento in 4 page, che sarano 6 mexi e più, pregano la Signoria provedi più presto etc. Il principe li deteno bone parole, dicendo saria più presto etc.
     
      [271] Da poi disnar fo pregadi. Et leto lo infrascripte letere: