Di sier Zorzi Emo, provedador zeneral, da Gusolengo, più letere, le ultime di eri, hore ... Prima aver da Roverè, che a dì 6 vene cavali ... et fanti ... fin su le porte, e dimandò il passo. Et Sachozo, contestabile nostro novo, da Spoliti, volse lui farli la risposta, dicendo non dariano il passo ni quella terra senza hordine di la Signoria nostra, si venisse Cesaro im persona, non che l'imperador; dicendo erano ben in hordine. Item, non è sequito altro. Et fo mandato il capitanio di le fantarie a Roverè con 600 provisionati, et per difenderlo. Item, a Brentonega è Dionisio di Naldo e Latantio da Bergamo, con ... fanti. Item, mandono missier Zuan Paulo Mamfron, con la sua compagnia, a lozar a Cavrin, a guardar quelli passi. Item, aspetavano zonzesse le zente d'arme di brexana, e il conte Bernardim, qual è in cremonese etc. Item, che ozi, a dì 9, doveano andar, esso capitanio zeneral nostro et il provedador, a Villa Francha o a Valezo, et esser a parlamento con missier Zuan Jacomo Triulzi, qual è zonto in mantoana con le zente, alozato a quelli confini; sì che l'intrar in Verona e alozar in la citadella, che havia fato et ordinato il conte capitanio zeneral, par sia suspeso, imo voleno star a la campagna, et mantegnir li passi, Item, per le ultime di eri, scrive il provedador che à aviso, il re di [280] romani è andato in Val Sugana, per venir per la via passò li fanti in vicentina, et de lì calarsi zoso di monti. Item, à fato far pan assai in Roverè; et tien gran guardie, e le porte di Trento serate.