Et per il trivixan fo scrito mandasse zente in visentina; adeo ozi fui a Mestre, e vidi tutto era pieno di villani, che erano stà comandati eri, et li scriveva, e davano danari, zoè mezo ducato per uno, e li mandavano in vicentina.
     
      Da poi disnar fo pregadi. E nota, di la tansa che [285] si scuode a la camera d'imprestidi, per sier Almorò Donado et sier Nicolò Gradenigo, oficiali, eri fo scosso zercha ducati 5000, ozi ducati 8000. Introno a la bancha consieri sier Alvixe Venier et sier Pollo Pixani, el cavalier, in locho de li do provedadori è andati. Et fo stridato di far 3 consieri di qua da canal, che non è tempo.
     
      Di Valezo, di sier Zorzi Emo, provedador zeneral, di 9. Come in quella matina era zonto lì, insieme col capitanio zeneral nostro, et domino Lucio Malvezo. Et vene il signor missier Zuan Jacomo Triulzi con 200 cavalli, tra i qual 50 stratioti, vestiti di rosso, el resto à la divisa dil Triulzi; et vene col stendardo avanti et trombeti. Et poi che ebeno fato ivi le acoglientie insieme, et disnono, da poi disnar fonno in consulto, et conduseno voler tenir le frontiere animosamente, a le qual continue fo ordinato mandar provisionati; et che non solum voleano difendersi, ma etiam andar a trovar l'inimicho sul suo, e far testa a Seravalle; et che fin 2 zorni saria con 3000 cavalli e 4000 fanti, qualli zà sono in mantoana a Gusolengo, et di lì anderiano con le nostre zente più avanti; et fo ordinato li alozamenti a Gusolengo etc. Item, altre letere di esso provedador, dil ritornar a Gusolengo, et di lo expedir di domino Zuan Paulo Manfron con la sua compagnia per visentina.